Gjyqtarët në ndeshje sportive shpesh herë janë cak i ofendimeve e kërcënimeve nga tifozët e klubeve, por edhe nga vetë pjesëtarët e ekipeve. E këto në shumë raste eskalojnë edhe në sulme fizike, duke vështirësuar kështu kryerjen e detyrave të tyre dhe duke cenuar integritetin e tyre, raporton Gazeta Sinjali.
Me kërcënime, sharje e sulm fizik u përball edhe gjyqtarja që po ndante drejtësinë në ndeshjen e basketbollit në mes të KB Sfera dhe KB Vëllaznimi e cila u zhvillua të shtunën në Skenderaj.
Burimet e Gazetës Sinjali bëjnë me dije se ka qenë trajneri i KB Sfera dyshohet se gjatë gjithë ndeshjes ka sharë e ofenduar me fjalë fyese gjyqtaren dhe të njëjtën e ka gjuajtur me karrige.
Të njëjtat burime njoftojnë se sjelljet e papranueshme të trajnerit kanë përfunduar edhe pasi ka përfunduar ndeshja, pasi ai dyshohet se ka pritur jashtë palestrës viktimën dhe të njëjtën e sulmuar fizikisht duke e kapur për fyti e duke e kërcënuar se do t’ia presë kokën nëse hyn në sallë.
Përballë kësaj situate, tejet e shqetësuar dhe e frikësuar, gjyqtarja ka denoncuar rastin në Polici dy ditë më vonë, ku ka deklaruar se motivi që dyshohet se shtyu të dyshuarin të bëjë këtë veprim, është një faull të cilin ia ka dhënë ekipit të KB Sfera.
I dyshuari nuk është arritur që të arrestohet ende, mirëpo janë marrë të gjitha veprimet hetimore që ndihmojnë në lokalizimin e vendndodhjes së tij.
Me urdhër të prokurorit, rasti është iniciuar ‘Sulm’ dhe ‘Kanosje’, ndërsa veprimet tjera ligjore do merren posa të kapet i dyshuari.
