Lidhja Demokratike dhe Lëvizja Vetëvendosje kanë prishur koalicionin në komunën e Vushtrrisë, kjo për shkak se partia e Kurtit në këtë komunë nuk e kanë përkrahur dje Programin për Rimëkëmbje Ekonomike, shkruan Gazeta Sinjali.
Lajmin për Sinjalin e ka konfirmuar, kryetari i komunës që vjen nga LDK, Xhafer Tahiri.
“Natyrisht nuk mundem të lejoj që vendimet që merren si parti të ndikojnë komunën. Që nga fillimi kam thënë se komuna është e qytetarëve dhe jo e partive politike. Prandaj do të vazhdoj ta mbaj këtë qëndrim deri në fund. Vendimet e një partie politike nuk munden të ndikojnë në plane kapitale siç është Rimëkëmbja Ekonomike. Tashmë jemi në mbledhjen e kryesisë së partisë. Mbrëmë ia kam bërë të qartë kryetarit të degës së LVV-së për këtë çështje”, tha Tahiri për Sinjalin.
Xhafer Tahiri tregoi se plani i rimëkëmbjes ekonomike të Vushtrrisë ka 3 masa – propozime themelore që duhet të aprovohen në Kuvend të Komunës dhe nga Qeveria e Kosovës.
