Anëtari i Lëvizjes Vetëvendosje, Sami Kurteshi ka thënë se për votimin e Qeverisë Hoti sot në Kuvendin e Kosovës ka votuar edhe një deputet i cili e ka humbur mandatin e tij, shkruan Gazeta Sinjali.

Sipas tij, për Qeverinë Hoti votoi edhe Etem Arifi për të cilin thotë se ka humbur mandatin e deputetit për shkak të dënimit me 1 vit e 3 muaj burgim.

“Sot, me 61 vota për, 1 abstenim dhe 24 vota kundër, u votua nga Kuvendi Qeveria Hoti. Etem Arifi ka votuar për. I njëjti ka votuar edhe për mocionin e mosbesimit më 25 mars 2020 kundër Qeverisë Kurti. Etem Arifi është i dënuar me 1 vit e 3 muaj burg efektiv. Kjo normë nuk duhet interpretuar vetëm nga Gjykata Kushtetuese, sepse, sipas përvojës së deritashme të hidhur, si mashë e krimit politik që është dëshmuar, ajo mund të bëjë interpretim që edhe këtë normë e shndërron në të kundërtën e saj. E gjykata e rregullta nuk e bëjnë këtë, sepse ato e kanë dhe vendimin”, ka shkruar Kurteshi në Facebook.

Me këtë rast, anëtari i LVV-së ka cituar nenin 70 të Kushtetutës së Kosovës në të cilin përkufizohet se mandati i deputetit mbaron ose bëhet i pavlefshëm nëse dënohet me vendim gjyqësor të formës së prerë për vepër penale me një ose më shumë vjet burgim./Gazeta Sinjali/