Ministrja e Arsimit, Shkencës, Teknologjisë dhe Inovacionit, Arbërie Nagavci, ka bërë të ditur se gjatë kësaj jave do të merret vendimi nëse do të ketë ndryshim të orarit mësimor për pjesën e mbetur të këtij viti shkollor, transmeton Gazeta Sinjali.

Nagavci tha se nesër do të ketë një takim me task forcën në nivel të Kosovës, ndërsa të premten me Drejtoritë Komunale të Arsimit, ku do të diskutohen këto çështje.

Sa i përket fillimit të vitit të ri shkollor, Ministrja Nagavci u shpreh se besojnë se gjithçka do të fillojë me kohë dhe nuk do të ketë vonesa.

“Për vitin e ardhshëm shkollor besojmë se që do të fillojë gjithçka me kohë. Ndërkaq sa i përket këtij viti shkollor ne kemi të premten një mbledhje me DKA-të[…]

Ne kemi kërkuar edhe nga task forcat në nivel të komunave që të na njoftojnë për gjendjen në komuna, nesër kemi edhe një takim të task forcës në nivel të Republikës së Kosovës edhe do të diskutohen të gjitha këto çështje që kanë të bëjnë me vazhdimin e procesit deri në përfundim të këtij viti shkollor”, tha ajo para mediave.

Kujtojmë se aktualisht shkollat në të gjithë vendin janë duke e mbajtur mësimin me orar të shkurtuar, ndërsa ditëve të fundit pas rënies së numrit të rasteve të reja me COVID-19, ka pasur kërkesa që shkollat t’i rikthehen orarit të zakonshëm mësimor. /GazetaSinjali/