Prej vitit 2018, reprezentuesi shqiptar, Marash Kumbulla është pjesë e elitës së futbollit Italian, Serie A.
Mbrojtësi i kombëtares kuqezi fillimisht e ka nisur aventurën e tij me fanellën e Veronës, ndërsa tashmë është pjesë e kryeqytetasve të Romës.
Përgjatë kësaj periudhe, 21-vjeçari ka festuar edhe një arritje të veçantë për të duke qenë se ka koleksionuar plot 50 paraqitje në elitë.
Për këtë moment, Kumbulla ka vendosur të publikojë në llogarinë e tij në Instagram një video me momentet e tij më të mira, ku përfshihet goli i parë në Serinë A me fanellën e Veronës, e më pas edhe golat e shënuar me Romën, por edhe çaste të tjera ku dalin në pah vlerat e futbollistit.
Sakaq, nëpërmjet Instagram, Kumbulla garanton se ky është vetëm fillimi dhe momente më të bukura e presin në karrierën e tij.
