Kryetari i Shtimes, Qemajl Aliu ka reaguar pas ngjarjes tragjike në Kroaci, ku një familje kosovare nga Shtimja që po udhëtonte nga Gjermania drejt vendlindjes për pushimet e verës, u aksidentuan rëndë me veturë dhe si pasojë gruaja bashkë me vajzën humbën jetën, ndërsa burri dhe djali kanë mbetur të lënduar rëndë, raporton Gazeta Sinjali.
Aliu u shpreh i tronditur nga ky lajm, teksa u përcolli ngushëllime miqve e të njohurve të viktimave.
Ai gjithashtu iu uroi shërim të shpejtë burrit dhe babait të viktimave, Safet Gashit dhe djalit të tij, të cilët mbetën të lënduar në këtë aksident.
Postimi i plotë i tij:
Jemi tronditur thellë nga lajmi i kobshëm i aksidentit me fatalitet që e ka pësuar bashkëqytetari ynë Safet Gashi nga fshati Pjetërshticë.
Gjatë rrugës së kthimit për në vendlindje për t’i kaluar pushimet verore, për fat të keq në shtetin e Kroacisë, familja Gashi kanë pësuar aksident me fatalitet, ku kanë mbetur të vdekura Njomza Olluri-Gashi dhe Olta Gashi.
Ky lajm i trishtë na ka prekur skajshmërisht andaj familjeve Gashi dhe Olluri, miqve e të njohurve të tyre ua përcjellim ngushëllimet më të sinqerta për këtë tragjedi të rëndë që na ka goditur të gjithëve.
Safetit dhe djalit të tij u urojmë shërim të shpejtë dhe lutemi që ky të jetë rasti i fundit ku bashkëkombasit tanë pësojnë aksidente e humbin jetën në rrugë.
