Kryeministri i Japonisë Fumio Kishida thotë se perspektiva e përdorimit të armëve bërthamore nga Rusia është “gjithnjë e më e vërtetë”, ndërsa përshëndeti një vizitë të ambasadorit të Shteteve të Bashkuara në Hiroshima, qyteti i parë që pësoi një sulm bërthamor.
Japonia, i vetmi vend i sulmuar nga armët atomike, është shprehur rregullisht kundër armatimeve bërthamore. Kishida vizitoi memorialin dhe muzeun e paqes të qytetit të shtunën me të dërguarin Rahm Emanuel.
“Kur përdorimi i mundshëm i armëve bërthamore nga Rusia është gjithnjë e më real, unë besoj se vizita e ambasadorit Emanuel në Hiroshima dhe përvoja e tij për të parë realitetin bërthamor do të bëhet një mesazh i fortë për shoqërinë ndërkombëtare”, tha Kishida për transmetuesin publik NHK.
Putin nuk ka kërcënuar drejtpërdrejt me një sulm bërthamor. Por ai paralajmëroi se kushdo që pengon Rusinë do të përballet me “pasoja të tilla që nuk i keni hasur kurrë në historinë tuaj” – një deklaratë që disa liderë e morën si kërcënim për përdorimin e armëve bërthamore, shkruan Al Jazeera.
Zëdhënësi i Kremlinit Dmitry Peskov tha të martën se Rusia do të përdorë armë bërthamore vetëm për të kundërshtuar “një kërcënim ekzistencial për vendin tonë“.
