Kryetari i Partisë Demokratike të Kosovës, Memli Krasniqi i ka shkruar një letër kryeministrit Albin Kurti duke i shprehur shqetësimin e tij lidhur me situatën me pandeminë COVID-19, shkruan Gazeta Sinjali.
Krasniqi në letrën e tij ka shprehur kërkesën dhe gatishmërinë e PDK-së që deputetët e Kuvendit të Kosovës të ndërprejnë pushimin dhe t’i kthehen punës menjëherë për të gjetur mundësi të mbështetjes për qytetarët në këto kohë të vështira.
“Duke parë që nuk janë bërë planifikimet e duhura gjatë rishikimit të Ligjit për Buxhetin për ta trajtuar pandeminë, PDK e konsideron të domosdoshëm ndryshimin dhe plotësimin e këtij Ligji për t’u dalë në ndihmë qytetarëve. Rrjedhimisht, PDK e konsideron të domosdoshme ndërprerjen e pushimeve dhe kthimin e menjëhershëm të deputetëve në Kuvendin e Kosovës dhe është e gatshme që të përshpejtojë marrjen e vendimeve për tejkalimin e kësaj tragjedie”, ka shkruar Krasniqi.
Ai ka njoftuar se për këtë do të bisedojë edhe me kryetarin e LDK-së, Lumir Abdixhiku dhe kreun e AAK-së, Ramush Haradinaj.
“Na duhet një front i përbashkët, e jo një luftë e brendshme politike, për t’i dalë në ballë pandemisë dhe krah nevojave të qytetarëve”, ka thënë Krasniqi në postimin e tij në Facebook.
Gjatë ditës së djeshme edhe bashkëpartiakia e Krasniqit, Blerta Deliu-Kodra ka kërkuar që deputetët të ndërpresin pushimet dhe të kthehen në kuvend.
Letra e plotë e Krasniqit dërguar kryeministrit Kurti:
I nderuar Kryeministër,
Kosova po kalon nëpër një tragjedi dhe qytetarët me të drejtë janë në ankth për veten e familjet e tyre.
Humbjet e shumta të jetëve në betejë me Covid-19, spitalet e stërmbushura, numri i lartë i të infektuarve, si dhe mungesa e vaksinave që është evidente, do të duhej të na alarmonin të gjithëve, pa dallim.
Kjo gjendje tejet e rëndë, që fatkeqësisht ka ardhur si pasojë e mungesës së menaxhimit efikas, kërkon një reagim urgjent, një plan të gjithanshëm dhe një angazhim maksimal të institucioneve shtetërore.
Partia Demokratike e Kosovës ka qenë konsistente në qëndrimin se duhet një front i përbashkët për t’i dalë në ballë pandemisë dhe krah nevojave të qytetarëve, e kurrsesi një luftë e brendshme politike.
Që nga fillimi i pandemisë, PDK, duke qenë në opozitë, ka dhënë ndihmën e saj në hartimin dhe votimin e Ligjit për Parandalimin dhe Luftimin e Pandemisë dhe Ligjit për Rimëkëmbjen Ekonomike, si dhe ka përkrahur marrëveshjet ndërkombëtare për ballafaqim me situatën pandemike.
Edhe sot, për ta ndalur këtë hov të kobshëm të pandemisë, PDK është e gatshme që në Kuvendin e Kosovës të ofrojë zgjidhje për qytetarët.
Duke parë që nuk janë bërë planifikimet e duhura gjatë rishikimit të Ligjit për Buxhetin për ta trajtuar pandeminë, ndonëse varianiti Delta shihej nga ekspertët botërorë si ortek që po vinte me shpejtësi, PDK e konsideron të domosdoshëm ndryshimin dhe plotësimin e këtij Ligji për t’u dalë në ndihmë qytetarëve të vendit. Rrjedhimisht, PDK e konsideron të domosdoshme ndërprerjen e pushimeve dhe kthimin e menjëhershëm të deputetëve në Kuvendin e Kosovës dhe është e gatshme që të përshpejtojë marrjen e vendime për tejkalimin e kësaj tragjedie.
Të infektuarit kanë nevojë për mbështetje me barna, profesionistët shëndetësorë për mbështetje me shtesa të merituara, spitalet për investime emergjente, bizneset për ndihma financiare, qytetarët për siguri. Të gjithë kanë nevojë për ta ndjerë praninë dhe kujdesin institucional, në mënyrë që të përballohet më lehtë kjo situatë e rëndë.
Nuk ka prioritet më të madh dhe nuk ka çështje tjetër më të rëndësishme që duhet të marrë vëmendje! /GazetaSinjali/
