Pothuajse të gjitha partitë politike në vend, janë bërë gati për zgjedhjet e parakohshme. Edhe legjislatura aktuale e Kuvendit të Kosovës pritet të shpërbëhet brenda ditëve, duke lënë kështu shumë projektligje të pavotuara, ndër to edhe “Projektligji për ratifikimin e Marrëveshjes financiare për IPA 2018”, njofton KTV.

Sipas Demush Shashës nga Instituti EPIK, rrezikohet humbja e 90.5 milionë euro fondeve nga Bashkimi Evropian.

“Në këtë drejtim, duhet nënvizuar se afati përfundimtar për ratifikimin e marrëveshjes IPA 2018 është 31 dhjetori 2019. Rrjedhimisht, ratifikimi i marrëveshjes mund të bëhet nga legjislatura e ardhshme e Kuvendit. Sidoqoftë, ky skenar do të kërkonte konstituimin pa vonesa të Kuvendit. Në këtë kontekst, mosratifikimi i marrëveshjes nga legjislatura aktuale apo vonesat në konstituimin e legjislaturës së ardhshme para datës 31 dhjetor 2019 rrezikojnë humbjen e 90.5 milionë eurove”, ka thënë Shasha.

Shasha shton se Kosova ka krijuar një trend të humbjes së fondeve në BE-ja, ku në gusht të 2018-s, ka humbur mbi 43 milionë euro, e në qershor 2019 rreth 12 milionë euro.

Ndërkaq, burime të KTV-së thonë se një prej arsyeve që kanë ardhur te vonesat e votimit të IPA-s është se zyra ligjore e Ministrisë së Integrimeve, e cila e ka vonuar një opinion ligjor për projektligjin, sepse do të votohej më herët.

LDK-ja është partia e vetme që ka kërkuar që para shpërbërjes së Kuvendit, të votohen fondet e IPA-s.

Shasha ka folur edhe për emërimin e Komisionerit për Informim dhe Privatësi. Ai ka thënë që partitë po e zvarrisin këtë proces.

“Sa i përket Komisionerit për Informim dhe Privatësi, ka pasur përpjekje nga ana e partive në pushtet që të vazhdojnë kapjen e institucioneve të pavarura. Pas shqetësimeve të ngritura nga shoqëria civile dhe media, konkursi i parë u anulua. Sidoqoftë, partitë në pushtet qëllimisht kanë zvarritur emërimin e Komisionerit për të siguruar dështimin e tij”, ka thënë Shasha.

Ndërkaq, nuk janë vetëm këto punë që nuk u kryen nga Kuvendi i Kosovës.

Sipas Institutit të Kosovës për Drejtësi, Kuvendi në sesionin pranveror ka përmbushur agjendën e tij vetëm 18 përqind.

Edhe në vitin e kaluar, Kuvendi i Kosovës ka pasur një përqindje të ulët të përmbushjes së agjendës legjislative. KDI-ja, në raport për punën e Kuvendit, thekson se vetëm 42 përqind e agjendës është përmbushur gjatë 2018-s./Sinjali/