Regjisori dhe skenaristi shqiptar, Kujtim Gjonaj, ka ndërruar jetë si pasojë e infektimit me COVID-19, shkruan Gazeta Sinjali.

Lajmin për vdekjen e tij e ka bërë të ditur djali i tij, Gent Gjonaj, i cili ka thënë se babai i tij ka ndërruar jetë sot rreth orës 18:30 në spitalin “Shefqet Ndroqi” në Tiranë.

“Kujtim Gjonaj, babai im, idhulli im, gjyshi i urtë dhe i dashur i fëmijëve të mi, i fëmijëve të motrës, Valbona, dhe vëllait Martin, ndërroi jetë qetësisht në spitalin ‘Shefqet Ndroqi’. Kaloi me dinjitet shumë peripeci shëndetësore, shumë vështirësi jetësore, dha shumë në jetë, me dijen e vet, humanizmin, vlerat e pamata, por sot në 18:30 datë 28 shkurt 2021, u nda nga kjo jetë”, shkruan ai.

Ai njofton se varrimi do të bëhet nesër në orën 14:00, ndërsa për shkak të situatës së Covid -19 homazhet do të bëhen në një moment të dytë.

“Ne, fëmijët e tij, miqtë e tij do t’i japim nesër një strehë tjetër, pranë prindërve të vet që i deshi aq shumë. Ceremonia e varrimit do të jetë nesër në orën 14.00, në Sharrë, duke u nisur nga shtëpia e funeralit Alba, te Medreseja. Nderimet për të, në një moment të dytë dhe gjithë jetën. Me peshën e një kumti kaq të dhimbshëm, ju falënderoj për mesazhet e ngushëllimit… Ju ardhshim për gëzime…”, përfundon postimin djali i skenaristit Kujtim Gjonaj./Gazeta Sinjali/