Agim Aliu, kryetari i Komunës së Ferizajt në të cilën momentalisht janë 230 raste aktive me koronavirus, ka apeluar qytetarët të mos bëjnë panik, pasi që sipas tij Qendra Kryesore e Mjekësisë Familjare dhe Spitali i Ferizajt kanë shtretër të mjaftueshëm për secilin rast të dyshuar me COVID-19 në këtë komunë, raporton Gazeta Sinjali.

Aliu po ashtu ka njoftuar se në mbledhjen e sotme të Shtabit Emergjent Lokal për përballimin e situatës me COVID-19, kanë marrë këto vendime:

•  Të vihen në funksion të përballimit të fluksit të pacientëve me COVID-19 dhe të dyshuarve, hapësirat e QKMF 4 dhe Qendrës së Shëndetit Mendor në Ferizaj;

• Të aktivizohet shërbimi i rentgenit të QKMF-së për nevoja të situatës;

•  Të zhvendosen shërbimet e gjinekologjisë, kirurgjisë dhe ortopedisë së Spitalit të Përgjithshëm të Ferizajt në QKUK me qëllim të krijimit të hapësirave të reja në funksion të trajtimit të rasteve me COVID-19;

•  Shtohen kapacitetet e Qendrës së Thirrjeve në QKMF për kontaktimin e rasteve me COVID-19 si dhe shtohen vizitat shtëpiake të pacientëve të infektuar me COVID-19;

• Hapësira të caktuara të Dispanzerit vihen në dispozicion të nevojave të veçanta shëndetësore;

•  Mjekët familjarë konform udhëzimeve e vendimeve të fundit të MSh dhe IKSHPK do të bëjnë diagnostifikimin klinik të të dyshuarve me COVID-19, urdhërojnë izolimin dhe në bashkëpunim me QRSHP monitorojnë gjendjen e pacientëve deri në konfirmimin e shërimit.

• Shtohen vizitat e inspektorëve të Komunës në veprimtari të ndryshme me qëllim zbatimin e vendimeve për masat mbrojtëse nga virusi COVID-19./Gazeta Sinjali/