KFOR ka shpërndarë për herë të dytë pajisje mbrojtëse personale në objektet mjekësore dhe institucionet e tjera në Kosovë, shkruan Gazeta Sinjali.

Nga donacioni i dytë i KFOR-it, i cili përmban masaka, dorëza, termometra e dezinfektues, do të përfitojnë Spitalet, Qendrat e Shëndetit Familjar, Klinikat, Njësitë e Policisë së Kosovës dhe pakicat në tërë territorin e Kosovës.

“Pas dhurimit të parë që u bë në prill, Ushtarët e Forcës së Kosovës të drejtuar nga NATO përsëri dorëzuan mijëra maska mbrojtëse ​për fytyrë, dorëza, termometra, veshje izolimi dhe dezinfektues për duar. Kjo iniciativë e dytë u financua gjithashtu nga NATO dhe është pjesë e angazhimit të përgjithshëm të Aleancës është mbështetja e operacioneve të saj dhe e vendeve anëtare dhe partnerëve të saj”, thuhet në kumtesën e KFOR-it.

Me këtë rast, KFOR ka njoftuar se momentalisht në Kosovë janë duke shërbyer 3 mijë e 500 ushtarë nga 27 kombe dhe të njëjtit po zbatojnë me kujdes masat për të kufizuar përhapjen e virusit dhe për të minuar rrezikimin e komunitetit, në përputhje me udhëzimet e Organizatës Botërore të Shëndetit./Gazeta Sinjali/