Kandidatët të cilët kishin aplikuar të futen në provim për patentë shofer në Qendrën e Patentë Shoferit në Prishtinë, sot nuk kanë pasur mundësi t’i nënshtrohen këtij provimi, pasi ekzaminerët munguan për shkak se nuk kishin kontratë për punë.

Kaosi në këtë qendër ka ardhur pas hyrjes në fuqi të Ligjit për zyrtarët publikë, që ka hyrë në fuqi në ditën e 11-të të shtatorit.

Zyrtarë të kësaj Qendre nuk pranuan të flasin, përveç se kërkuan që të marrim informacione në Ministrinë e Infrastrukturës lidhur më këtë çështje.

Fillojetë Konjuhi nga Ministria e Infrastrukturës, tha nëpërmjet telefonit se kandidatët sot nuk kanë mundur të futen të provim, për shkak të shkëputjes së disa kontratave për zyrtarë të Qendrës së Patentë Shoferit në Prishtinë.

“Me hyrjen në fuqi të Ligjit për zyrtarët publikë, që ka hyrë në fuqi në ditën e 11-të të shtatorit, ka ndikuar që të shkëputen kontratat për zyrtarë. Ajo çfarë kë ndodhë sot në Qendrën e Patentë Shoferit, është për shkak të këtij ligji, që ishte dashur të shkëputen kontratat mbi vepër”, theksoi shkurt Konjuhi.

Konjuhi nuk ka dhënë informacione të tjera për numrin dhe çfarë do të ndodhë më tutje.

“Për informacione më të hollësisht do t’iu njoftojmë nëpërmjet një komunikate”, tha ajo.

Ndërsa, kandidatët të cilët ishin paraparë të futen sot të provim, pohuan prapa kamerës se nuk kanë qenë të njoftuar për anulimin e këtij provimi, teksa theksuan se kaosi i sotëm nuk mund të arsyetohet në asnjë mënyrë.

Njëri prej tyre tha se sipas orarit kanë shkuar sot me hyrë në provim për patentë shofer, por për të gjithë kandidatë është kërkuar që të shtyhet me arsyetimin se mungojnë ekzaminerët./Gazeta Sinjali/