Kryetari i Komunës së Kamenicës, Qëndron Kastrati dhe kryetari i Komunës së Gjilanit, Lutfi Haziri, kanë nënshkruar marrëveshje bashkëpunimi, sipas së cilës nga shtatori do të fillojë dega e shkollës së muzikës edhe në Kamenicë.

Kastrati tha se sot u diskutua për menaxhimin e pandemisë dhe situatën në rajonin e Gjilanit.

“Diskutuam për menaxhimin e pandemisë dhe rreth situatës në komunën tonë. Ne do të vazhdojmë të nënshkruajmë me kryetarin e Komunës së Gjilanit një marrëveshje ku shkolla e muzikës do të hapet në Kamenicë me ndihmën e Komunës së Gjilanit. Kjo është ajo që na duhet gjatë një kohë pandemie ku të gjithë duhet të jemi së bashku dhe ta ndihmojmë njëri- tjetrin”, tha ai në një konferencë për media.

Kryetari i Komunës së Gjilanit, Lutfi Haziri, ka thënë se Gjilani dhe Kamenica janë duke bashkëpunuar gjatë tërë kohës, pasi që sipas tij problemet janë të njëjta anipse në territore të ndara.

“Koordinimi jonë për bashkëpunim komunal, në zgjidhjen e problemeve për arsim dhe bashkëpunimi ynë në segmentin e infrastrukturës, rregullimi i kufijve administrativë në mes të komunave, çështja e problemeve lokale dhe ekonomike, së fundi ne e kemi një treg të përbashkët për ekonominë private në komunën tonë. Dhe ka edhe shumë çështje tjera për të cilat e ndihmojmë komunën tonë dhe njëri-tjetrin… Ne i kemi problemet e njëjta në territore të ndara në aktivitete dhe detyra. Por problemet i kemi të njëjta, duke filluar prej buxhetit e deri tek investimet të buxhetit për çështje të caktuara me të cilat duhet të përballemi çdo ditë”, ka thënë Haziri.

Për këtë bashkëpunim kanë qenë falënderues edhe kryetari i Ranillugut, Vladica Artinoviq dhe ai i Novobërdës, Vetislav Ivanoviq. /Gazeta Sinjali/