Irani ka bërë të ditur se do të kërkojë vendosjen e tarifave të shërbimit për anijet që kalojnë Ngushticën e Hormuzit, në këmbim të sigurimit të shërbimeve për lundrim, në vend të tarifave të tranzitit.
Irani “nuk po kërkon të mbledhë tarifa kalimi, taksa tranziti ose pagesa për të drejtat e tranzitit”, tha të enjten zëvendësministri i Jashtëm i vendit, Kazem Gharibabadi, në një intervistë me median gjysmëzyrtare iraniane Mehr.
Sipas tij, në vend të kësaj, Teherani do të kërkojë kompensim për shërbimet e ofruara së bashku me Omanin, përfshirë ndihmën në navigim, kërkim-shpëtimin, shërbimet e sigurisë dhe shërbimet e pastrimit të mjedisit në rast ndotjeje.
Rruga ujore strategjike “shtrihet tërësisht brenda ujërave territoriale të Iranit dhe Omanit”, shtoi Gharibabadi, duke theksuar se këto shtete kanë sovranitet mbi ngushticën “sipas ligjit ndërkombëtar dhe ligjit të detit”.
Zëvendësministri i Jashtëm tha se marrëveshjet që po hartohen do të jenë në përputhje me të drejtën ndërkombëtare, por pranoi se “ato nuk do të jenë 100% të kënaqshme për disa vende”.
Sinjali – aty ku e vërteta flet para lajmit!
