Irani deklaroi se do të përgjigjet me vendosmëri ndaj çdo veprimi nga Shtetet e Bashkuara që shkel memorandumin e mirëkuptimit të arritur për t’i dhënë fund konfliktit në Lindjen e Mesme. Paralajmërimi vjen në një moment kur priten bisedime indirekte midis palëve në Katar.
Zëdhënësi i Ministrisë së Jashtme të Iranit, Esmaeil Baghaei, theksoi gjatë konferencës së rregullt javore për shtyp se Teherani nuk do të tolerojë asnjë shkelje të marrëveshjes.
“Nuk do të lëmë pa përgjigje asnjë veprim. Siç kanë demonstruar forcat e armatosura të fuqishme të Iranit, çdo akt agresioni kundër objektivave të Republikës Islamike të Iranit do të përballohet me një përgjigje të menjëhershme dhe vendimtare,” tha Baghaei.
Ai shtoi se çdo veprim i tillë do të konsiderohet shkelje e drejtpërdrejtë e Nenit 1 të memorandumit të mirëkuptimit.
“Nëse këto shkelje përsëriten dhe vazhdojnë, vazhdimi i këtij procesi do të hasë në vështirësi serioze,” paralajmëroi zëdhënësi.
Delegacionet nga Irani dhe Shtetet e Bashkuara pritet të takohen së shpejti në Katar për bisedime indirekte, të ndërmjetësuara nga palë të treta, me qëllim zbatimin e memorandumit që synon de-eskalimin e tensioneve rajonale dhe ndalimin e luftimeve në Lindjen e Mesme.
Marrëveshja konsiderohet një hap delikat diplomatik pas muajve të tensioneve të larta, sidomos pas përplasjeve ushtarake të fundit në rajon që kanë rrezikuar stabilitetin ndërkombëtar.
Sinjali – aty ku e vërteta flet para lajmit!
