Presidenti i Shteteve të Bashkuara, Donald Trump, ka kritikuar ashpër Senatin amerikan pasi ky i fundit miratoi një rezolutë që bën thirrje për t’i dhënë fund luftës me Iranin, duke e cilësuar atë si “të ndodhur në kohë të keqe” dhe “të mangët në substancë”.
Në një postim në platformën Truth Social, Trump ka deklaruar se votimi është zhvilluar në një kohë kur, sipas tij, Irani po përballej me presion të madh.
“E kam Iranin në telashe, gati për t’u rrëzuar, dhe Senati Amerikan vendos të vazhdojë me një votim të parakohshëm dhe të pakuptimtë për Aktin e Pushteteve të Luftës”, ka shkruar ai.
Rezoluta u miratua me 50 vota pro dhe 48 kundër dhe është kryesisht simbolike, duke shprehur kundërshtimin e Kongresit ndaj vazhdimit të operacioneve ushtarake pa miratim të qartë parlamentar.
Trump ka argumentuar gjithashtu se iniciativa e Senatit e vështirëson punën e administratës së tij në raport me Iranin.
“Këta senatorë thjesht ma bënë punën më të vështirë. Por unë do ta përfundoj, në një mënyrë ose në një tjetër, sepse gjithmonë ia dal mbanë”, ka deklaruar ai.
Sinjali – aty ku e vërteta flet para lajmit!
