Instituti Kombëtar i Shëndetësisë Publike u ka bërë thirrje qytetarëve sërish që të mos dalin dhe të mos i shkelin rekomandimet kundër përhapjes së koronavirusit.

Teksa numri i të infektuarve me Covid-19 ka shkruar në 86, IKSHPK ka paralajmëruar qytetarët se mund të shkaktojnë shpërthim të koronavirusit duke mos u përmbajtur rekomandimeve, shkruan Gazeta Sinjali.

“Qytetarë!
Çka jeni duke bërë? Kthjelluni ju lutem!
Duajeni këtë vend! Atdhe tjetër s keni!”

“Ju lutemi ti përmbaheni rekomandimeve të Institutit Kombëtar dhe mos dilni në grumbuj gjatë orëve të lira të lëvizjes sepse jeni duke rrezikuar veten dhe familjet e Juaja! Në Prishtinë po vërehen dalje masive në orët e lira të lëvizjes. Grumbuj të njerëzve që po rrezikojnë veten dhe të gjithëve! Ju lutem kini kujdes se mund të shkaktoni shpërthim epidemik në kryeqytet!”, apelon IKSHPK.

“Shikoni ju lutem valën epidemike në shtetet e Europës, veni gishtin në kokë dhe mendoni. Mos pengoni ekipet e Institutit me pyetje të cilat i keni mësuar tashmë nga rekomandimet e Instituti Kombëtar dhe Ministrisë së Shëndetësisë. Na ndihmoni ta kryejmë punën sublime por mundohuni të zbatoni secili detyrën e juaj duke ruajtur shëndetin tuaj. Ju kemi lënë të pushoni dhe jo secili të marr detyrën e epidemiologut duke pyetur detaje, duke u munduar të rikonstruktojnë çdo vatër infeksioni, duke u zhytur në kurreshtjen e njohjes së çdo procedure të hulumtimit. Pushoni dhe vetëm pushoni që të na lini të punojmë!
Ju gjendeni në shtëpitë e juaja me familiar. Ne akoma gjendemi në punë pa orar nga 15-20 orë! Për ju! E ju për ne: JU LUTEMI QËNDRONI NË SHTËPI!”, thuhet në fund të thirrjes së Institutit Kombëtar të Shëndetësisë Publike. /Gazeta Sinjali/