Banorët e një ndërtese në lagjen “Dardania” të Prishtinës janë terrorizuar sot kur pjesëtarët e Njësisë Speciale tentuan të hynin në banesën e A.T, i dyshuar për grabitje në një shtëpi në Shtime. Në kushte anonimiteti, fqiu i të dyshuarit ka rrëfyer ngjarjen për Sinjalin.

Para se A.T të prangosej, banorët e ndërtesës ishin terrorizuar me zhurmat e shkaktuara. I dyshuari përkunder vërejtjes që ka pranuar nga policia dhe kërkeses për hapjen e derës, ishte paraqitur sikur nuk ishte aty. Njësitet Speciale të  Policisë janë detyruar ta thyejnë derën, me ç’rast është arritur arrestimi i A.T.

“Ështe dëgjuar zhurmë e madhe gjatë përpjekjeve me thy derën e banesës”, thotë fqiu i A.T për Sinjalin.

Sipas tij, kjo situatë ka zgjatur rreth një orë.

Arrestimi i A.T u bë sot rreth orës 18:30. Ai është me prejardhje nga një fshat i Pejës por prej vitesh jetonte në lagjen “Dardania” në Prishtinë.  A.T është i dyshuar për grabitjen që ndodhi para dy ditësh në shtëpinë e një mërgimtari në Shtime. Sipas policisë, aty u vodhën 24 mijë franga, mbet i vrarë shoku i A.T, Fehmi Gashi dhe u plagos N.Ndrecaj (pronari i shtëpisë).

Sinjali merr vesh se sikurse viktima Fehmi Gashi edhe A.T ka pasur dosje në polici për narkotikë dhe vepra të tjera penale.

Në arrati për këtë grabitje janë edhe dy persona të cilët po kërkohen nga policia.