Autoritetet hungareze janë shprehur se nuk do të zbatojnë rekomandimin e BE-së lidhur me heqjen e kufizimit të udhëtimit për më shumë se 27 shtete jashtë bllokut anëtarësh.

Kryeministri i Hungarisë, Viktor Orban, tha se nuk do të zbatojë rekomandimin e Bashkimit Evropian, sepse sipas tij ata nuk mund të lejojnë hyrjen e qytetarëve jo të BE-së, me përjashtim të Serbisë.

Për të justifikuar vendimin e tij, Orban përmendi rrezikun e shpërthimeve të reja të rasteve me koronavirus.

Bashkimi Evropian, më 30 qershor, ka finalizuar një listë të vendeve- me më pak raste me koronavirus, qytetarët e të cilave lejohen të hyjnë në bllok nga 1 korriku.

Hungaria, vend me gati 10 milionë banorë, ka raportuar deri më tash pak më shumë se 4,100 raste me koronavirus dhe rreth 590 vdekje.

“Ne, aktualisht, nuk mund të zbatojmë kërkesën e BE-së për të lejuar hyrjen e qytetarëve jo të BE-së, me përjashtim të Serbisë”, tha Orban në një video-mesazh në Facebook.

Budapesti ka rihapur kufirin me Serbinë fqinje – e cila ka një popullsi të madhe etnike hungareze që jeton kryesisht përgjatë kufirit me Hungarinë – në muajin maj.

Por, heqja e kufizimeve të udhëtimit për më shumë vende jashtë BE-së “do të shkonte kundër interesave të kujdesit shëndetësor për popullin hungarez”, tha Orban.

Vendet në listën e BE-së janë: Algjeria, Australia, Kanadaja, Japonia, Gjeorgjia, Mali i Zi, Maroku, Zelanda e Re, Ruanda, Serbia, Koreja e Jugut, Tajlanda, Tunizia dhe Uruguaji, si dhe Kina nëse ka reciprocitet. Shtetet e Bashkuara dhe Rusia nuk janë në listë.

Edhe disa vende të tjera të BE-së gjithashtu kanë shprehur rezerva në lidhje me heqjen e kufizimeve të udhëtimit.

Austria ka thënë më 1 korrik se do të ndjekë rekomandimin e BE-së, por jo për Serbinë dhe Malin e Zi./ Gazeta Sinjali/