Komuna e Vitisë së shpejti pritet të hapë qendrën për grumbullimin e bimëve mjekuese aromatike, shkruan Gazeta Sinjali.

Kështu tha kryetari i kësaj komune, Sokol Haliti, gjatë shpërndarjes së subvencioneve për 20 fermerët e Vitisë të cilët përfituan sisteme të ujitjes pikë-pikë, në kuadër të projetit “Promovimi i Sektorit të Bimëve Mjekësore Aromatike në Viti”, i cili financohet nga Bashkimi Evropian dhe implementohet nga Programi për Zhvillim i Kombeve të Bashkuara (UNDP) përmes Programit Rajonal për Demokraci Lokale në Ballkanin Perëndimor ReLOaD.

“Kryetari Sokol Haliti duke falënderuar donatorët dhe implementuesit e projektit tha se ky sektor është mjaft profitabil dhe gjenerues i punësimit, duke inkurajuar edhe fermerët e tjerë që të merren me këtë prodhimtari. Sipas tij, lajm i mirë është se Vitia së shpejti do ta ketë edhe qendrën për grumbullimin e këtyre bimëve”, thuhet në komunikatë.

Haliti ka thënë se ky projekt do të realizohet në bashkëpunim me Drejtorinë e Bujqësisë, Pylltarisë dhe Zhvillimit Rural.

“Në bashkëpunim me donatorë të ndryshëm, po implementohen projekte që po ndikojnë në zhvillimin e shumë sektorëve në komunën tonë, siç janë: blegtoria, perimtaria, pemëtaria, etj. Qëllimi ynë gjithnjë ka qenë mbështetja e fermerëve, por edhe shfrytëzimi i potencialeve që ka komuna e Vitisë” , ka thënë ai.

Shqipe Shaqiri nga Local Solution, tha se në kuadër të projektit, përfituesit paraprakisht përmes trajnimeve kanë përfituar njohuri për kultivimin e bimëve aromatike mjekësore si dhe rëndësinë ekonomike që kanë.

Sipas saj, projekti do të vazhdojë me zhvillimin e një platforme online përmes së cilës fermerët do të marrin më shumë informacione dhe organizimin e një konference ku parashihet pjesëmarrja e aktërve që merren me bimë mjekësore aromatike në mesin e tyre edhe të atyre që merren me eksportimin e tyre jashtë vendit, por sipas saj do të hapet edhe qendra për grumbullimin e bimëve mjekuese aromatike./Gazeta Sinjali/