Gazeta Sinjali raportoi pak më parë për një rast jo fort të zakontë që ka ndodhur sot në stacionin policor në Klinë. Për një vjedhje të rëndë që u denoncua dje në Polici u zbulua hajni. Personi që vodhi paratë e gatshme dhe stolitë e arit ishte pronari i shtëpisë. Ai e pranoi se vodhi në shtëpinë e tij dhe vendosi të bashkëpunojë me Policinë. Por nuk shkoi siç u planifikua, pasi i njëjti arriti t’u ikë zyrtarëve policorë para syve.
Burimet e Gazetës Sinjali kanë dhënë detaje për rastin dhe të dyshuarin me të cilin u ballafaqua sot Policia.
I dyshuari që denoncoi dje rastin e vjedhjes në shtëpinë e tij në fshatin Sferkë të Klinës u intervistua sot në Polici. Gjatë intervistimit nga Njësia e Hetimeve, i njëjtië e pranoi se ka vjedhur stolitë e arit dhe paratë, por premtoi se të njëjtat do t’i kthente në stacion policor.
Ai u “dorëzua” para hetuesve policorë dhe vendosi të bashkëpunojë me të njëjtit. Por nuk shkoi siç u morën vesh.
Sipas burimeve të Sinjalit, në momentin që i dyshuari vendosi të bashkëpunojë me Policinë, nga i njëjti u kërkua që të shkojë për t’i marrë gjësendet dhe paratë që i kishte vjedhur.
Nën përcjelljen e Njësisë së Hetimeve, ai u nis me veturën e tij “Audi A8” për në ‘vendin’ ku kishte fshehur paratë e stolitë e arit. Por ai vend nuk u zbulua pasi i dyshuari arriti të ikë. Burimet e Sinjalit kanë njoftuar se i njëjti iku para syve të policëve dhe u largua në drejtim të Gjakovës.
Stacioni Policor në Klinë e ka shpallur të dyshuarin në kërkim dhe ka kërkuar ndihmë nga stacionet tjera policore, që nëse i njëjti ndalohet në ndonjë qytet tjetër, të kapet dhe të njoftohet baza e Policisë në Klinë.
