Gazeta Sinjali mëson se dje, në rrugën “Bahri Kuqi” në Vushtrri, persona të panjohur kanë depërtuar me forcë brenda shtëpisë së një zyrtari policor.
Numri i vjedhjeve është duke u rritur me një shpejtësi të madhe dhe ndaj pothuajse çdo personi, çka bën të dyshosh që hajnave nuk po u trembet syri nga askush.
Burime të Gazetës Sinjali bëjnë të ditur se në shtëpinë e zyrtarit policor, persona të panjohur kanë vjedhur sefin e armës zyrtare, ku brenda saj kishte pasur një karikator të armës zyrtare dhe 15 fishekë të kalibrit 9mm.
Këto burime njoftojnë se përveçse është vjedhur sefi dhe municioni i armës zyrtare, cak i hajnave ishte edhe një zinxhir në vlerë prej 300 euro.
Deri më tani nuk është identifikuar ndonjë i dyshuar dhe lidhur me rastin janë duke vazhduar hetimet.
