Komuna e Mitrovicës ka njoftuar se persona të panjohur kanë thyer, për dy ditë radhazi, Qendrat e Mjekësisë Familjare në Tunel të Parë dhe në Kushtovë.

Përmes një komunikate për media, Komuna e Mitrovicës ka njoftuar se në këto dy qendra janë shkaktuar dëme materiale dhe janë vjedhur disa pajisje mjekësore.

“Në këtë gjendje pandemie ku e gjithë vëmendja është drejt luftimit të virusit COVID-19, disa persona të papërgjegjshëm dhe të panjohur kanë thyer për dy ditë radhazi Qendrën e Mjekësisë Familjare në Tunel të Parë dhe në Koshtovë të Mitrovicës. Me këtë rast në këto dy qendra janë shkaktuar dëme materiale dhe janë vjedhur disa pajisje mjekësore, dhe për këtë gjë janë duke u marr organet e rendit dhe ligjit”, theksohet në njoftimin e komunës.

Gjithashtu, në këtë njoftim bëhet e ditur se dëmet e shkaktuar do të kompensohen nga Drejtoria e Shëndetësisë në Komunën e Mitrovicës.

“Drejtoresha e Shëndetësisë, Erseka Hasanaj Barani, ka vizituar të dy qendrat në fjalë dhe ka identifikuar dëmet e shkaktuara, duke thënë se këto dëme do të kompensohen me të gjitha pajisjet që mungojnë”, thuhet në njoftim. Gazeta Sinjali/