Pesë nga 15 ministritë do të udhëhiqen nga gratë, shkruan Gazeta Sinjali.
Vjosa Osmani dhe Arbërie Nagavci do ta udhëheqin Kuvendin e Kosovës, bashkë me kolegë të tjerë që e përbëjnë kryesinë e Kuvendit.
Në këtë legjislaturë është rritur numri i grave që kanë fituar mandatet e tyre pa kuotë.
Për rritjen e numrit të grave në Qeverinë e Kosovës është shprehur e lumtur ambasadorja e Kosovës në SHBA, Vlora Citaku.
“Vjosa është gruaja e parë që shërben si Kryetare e organit më të lartë legjislativ në #Kosovo. Ky moment historik është në krye të emërimit të 5 grave të mahnitshme si ministre”, ka shkruar Çitaku në rrjetin social Facebook.
Me 65 vota pro, Vjosa Osmani u zgjodh kryetare e Kuvendit të Kosovës. Ndërsa, nënkryetare e këtij institucioni është Arbërie Nagavci, që nga 26 dhjetori kur u konstitua Kuvendi.
Qeveria e re do t’i ketë pesë ministre femra, gjë që nuk ka ndodhur më parë, që kur Kosova është shtet i pavarur.
Ministret e reja të Qeverisë së Kosovës janë, Albulena Haxhiu-Ministre e Drejtësisë, Hykmete Bajrami-Ministre e Arsimit, Shkencës dhe Teknologjisë e Inovacionit, Rozeta Hajdari-Ministër i Ekonomisë, Punësisë, Industrisë, Ndërmarrësisë dhe i Investimeve Strategjike, Vlora Dumoshi-Ministre e Kulturës, Rinisë dhe Sportit dhe Emilia Rexhepi-Ministre Administrimit të Pushtetit Lokal.
Qeveria paraprake kishte dy ministre femra, njëra prej të cilave nuk e kishte çuar mandatin deri në fund.
Kujtojmë se sot u votua edhe Qeveria Kurti me 66 vota për dhe 10 abstenime, pas disa orësh debat nga opozita, të cilët e lëshuan sallën e Kuvendit pak para votimit të qeverisë./Gazeta Sinjali/
