Kryeministri i Shqipërisë, Edi Rama, ka folur sot gjatë një diskutimi në Jalë për raportet e tij me kryeministrin e Kosovës, Albin Kurti, si dhe me kreun e BDI-së, Ali Ahmeti.
Rama tha se ka raport të mirë me Kurtin dhe se gjatë takimeve të tyre bëjnë shumë humor me njëri-tjetrin.
“Albinin e takoj me kënaqësi, se na ecën muhabeti shumë mirë. Bëjmë shumë humor me njëri-tjetrin. Po të kishte kamera, do të habitej e gjithë dynjaja”, deklaroi Rama.
Megjithatë, kryeministri shqiptar theksoi se Kosova është shtet më vete dhe se ai nuk mund ta telefonojë Kurtin për t’i kërkuar të veprojë në një mënyrë të caktuar.
“Secili ka shtetin e vet, qeverinë e vet, mendjen e vet. Fatmirësisht, synimet i kemi të përbashkëta, metodat të ndryshme dhe s’ka problem”, tha Rama.
Ai foli gjithashtu për raportin e tij me kreun e BDI-së, Ali Ahmeti, duke e cilësuar atë si një miqësi për të cilën ndihet krenar.
Rama tregoi edhe për përpjekjet e tij për të bashkuar faktorin politik shqiptar në Maqedoninë e Veriut, sipas tij, me kërkesë të partive shqiptare.
Sinjali – aty ku e vërteta flet para lajmit!
