Berlini ka bllokuar fluturimet e linjave ajrore ruse që arrijnë në Republikën Federale, duke iu përgjigjur kështu refuzimit të Moskës për të autorizuar fluturimet e Lufthansës.

Sipas AFP, Ministria Gjermane e Transportit veproi në bazë të parimit të reciprocitetit.

Në vendimin e qeverisë gjermane thuhet se: “Në përputhje me praktikën e reciprocitetit, Autoriteti Federal i Aviacionit nuk lëshon leje të mëtejshme për fluturimet e kompanive të linjave ajrore ruse derisa autorizimet të pezullohen nga pala ruse”.

Vendimi vjen në mes të tensioneve në rritje midis Rusisë dhe Bashkimit Evropian rreth mbështetjes së Moskës për Bjellorusinë.

Blloku prej 27 vendesh dhe Shtetet e Bashkuara të Amerikës javën e kaluar futën sanksione të reja kundër Bjellorusisë, pasi autoritetet atje devijuan një fluturim ndërkombëtar për të arrestuar një gazetar disident.

Sanksionet vijnë mbi ato të vendosura ndaj zyrtarëve bjellorusë, duke përfshirë udhëheqësin e saj autoritar, presidentin Alexander Lukashenko, për manipulimin e zgjedhjeve dhe goditjen e protestave vitin e kaluar.

Ministria gjermane e Transportit bëri të ditur se Rusia “në mënyrë të njëanshme” pezulloi marrëveshjet dypalëshe mbi trafikun e linjave ajrore midis dy vendeve në mars të vitit 2020, për shkak të pandemisë së koronavirusit.

Fluturimet që nga ajo kohë janë miratuar reciprokisht në baza mujore.

Ministria njoftoi që ajo dhe ambasada gjermane në Moskë ishin në komunikim të ngushtë me autoritetet ruse të aviacionit./Gazeta Sinjali/