Sulmuesi i Milanit, Olivier Giroud këmbëngul se nuk është i fiksuar pas rekordit të golave të Thierry Henry me Francën.
Sulmuesi ‘kuqezi’ tani ka shënuar 48 gola me ‘Les Blues’, vetëm tre më pak se legjenda e Arsenalit, golashënuesi më i mirë i të gjitha kohërave me kombëtaren e tij, shkruan Sinjali Sport.
Francezi shënoi dy gola në dy ndeshjet e fundit me ‘Trekolorët’ kundër Bregut të Fildishtë dhe Afrikës së Jugut. Ai ishte rikthyer në kombëtare për herë të parë që pas Euros.
“Kam shënuar sërish dhe gjithmonë përpiqem të jap diçka më shumë kur luaj”, tha Giroud pas ndeshjes së Francës kundër Afrikës së Jugut të martën, cituar nga ‘Il Corriere dello Sport’. Antoine Griezmann dha një asistim të madh dhe unë bëra çmos për ta kthyer atë në gol. Jam i lumtur dhe jam më afër rekordit të Henrys. Është në kokën time, por nuk është një obsesion. Nëse më duhet të kaloj topin, e bëj, mendoj fillimisht për ekipin, do të vijë rekordi”, ka deklaruar Giroud.
Sidoqoftë, Didier Deschamps nuk mund të garantonte që Giroud do të fitonte thirrje për ndeshjet e ardhshme me Francën. Ai ishte pjesë e skuadrës 2018 që fitoi Kupën e Botës në Rusi.
Ish-sulmuesi i Chelseat dhe Arsenalit ka shënuar 11 gola në 29 paraqitje me Milanin këtë sezon, duke përfshirë dy kundër Interit dhe një kundër Napolit në ndeshjet kyçe për Scudetto. Milani është kryesuesi i tabelës së Serisë A me tri pikë epërsi ndaj Napolit dhe do të presë Bolognan në San Siro të hënën mbrëma.
