image Gazetari i RTK-së: Unë u bëra gati për t’i folur, zyrtari i PTK-së më grushtoi 50-60 herë në kokë

Kosovë

Gazetari i RTK-së: Unë u bëra gati për t’i folur, zyrtari i PTK-së më grushtoi 50-60 herë në kokë

news image

Altin Ahmeti, gazetar në Radio Televizionin e Kosovës, është sulmuar mbrëmë fizikisht përderisa po qëndronte në një kafeteri të kryeqytetit. Sulmin fizik e ka bërë të ditur vetë Ahmeti dhe ka thënë se është goditur nga një person që e njeh.

Për të kuptuar më shumë rreth ngjarjes, Gazeta Sinjali ka kontaktuar sot me gazetarin Altin Ahmeti, ai thotë se edhe pse e njeh personin nuk e di arsyen e sulmit.

Sipas tij, u sulmua nga punëtori i Telekomit të Kosovës, Gzim Makolli.

“Pesë persona ishin në vendngjarje dhe e bllokuan vendin, më sulmoi Gzim Makolli, s’kam asnjë problem privat me të”, tha Ahmeti për Gazetën Sinjali.

Ai tha se Gzim Makolli e grushtoi rreth 50-60 herë, edhe pse ky ishte bërë gati për ta përshëndetur.

“Jemi njohur kur hyri në lokal u bëra gati mi folë, ai më sulmoi me grushte. Pesë persona ishin, ata e ruajtën. Më sulmoi me 50-60 grushte në kokë, në tru, unë isha ulur, sulm prapa shpinës”, tha më tej Ahmeti për Gazetën Sinjali.

Rasti është raportuar edhe në Policinë e Kosovës, ndërsa personi i dyshuar ndodhet ende në arrati.

Lidhur me sulmin, ka reaguar menaxhmenti i Radio Televizionit të Kosovës.

“Sulmi ndaj gazetarëve është sulm ndaj lirisë së Kosovës. Kërkojmë nga organet e rendit që të zbardhin sa më shpejt rrethanat e këtij rasti dhe personat përgjegjës të dalin para drejtësisë”, thuhet ndër të tjera në reagimin e menaxhmentit të RTK-së.

Rastin e mbrëmshëm e ka dënuar edhe Asociacioni i Gazetarëve të Kosovës.

AGK përmes një reagimi ka kërkuar nga organet e rendit e të drejtësisë që t’i zbulojnë motivet e këtij akti dhe autorët t’i sjellin para drejtësisë. /Gazeta Sinjali/