Numri i rasteve të dhunës në familje në vendin tonë është në rritje çdo ditë e më shumë. Çdo ditë persona të ndryshëm që përjetojnë dhunë nga familjarët e tyre, kërkojnë ndihmën e Policisë për të marrë mbrojtje dhe për të zgjidhur problemet, raporton Gazeta Sinjali.
Një rast i rëndë i dhunës në familje dyshohet të ketë ndodhur mbrëmë në fshatin Slivovë të Ferizajt, ku një burrë ka sulmuar fizikisht bashkëshorten e tij.
Sinjali mëson se e tmerruar nga e gjithë situata, gruaja ka vendosur që të denoncojë rastin në Polici, ku para hetuesve policorë ka deklaruar se i shoqi pas një zënke verbale ka tentuar t’ia thyejë duart.
Si pasojë e dhunës që përjetoi, ajo ka marrë ndihmë mjekësore në spital, ndërkohë që i dyshuari ka rënë në prangat e Policisë dhe është shoqëruar në stacion policor për intervistim.
Pas përfundimit të procedurave policore, Prokurori i Shtetit ka nxjerrë aktvendim që të dyshuarit t’i caktohet masa e ndalimit në kohëzgjatje prej 48 orësh dhe i njëjti të hetohet nën dyshimet për kryerjen e veprës penale ‘Dhunë në familje’.
