Të paktën 1.5 milionë fëmijë janë larguar nga lufta në Ukrainë që nga fillimi i pushtimit më 24 shkurt, me mijëra të tjerë janë të zhvendosur brenda vendit.
UNICEF ka paralajmëruar se fëmijët që ikin nga shtëpitë e tyre po përballen me një kërcënim të mëtejshëm nga trafikantët e qenieve njerëzore, të cilët shpesh kërkojnë të shfrytëzojnë kaosin e lëvizjeve të mëdha të popullsisë.
Një analizë e fundit e kryer nga UNICEF dhe Grupi i Koordinimit Ndër-Agjencior kundër Trafikimit (ICAT) zbuloi se 28% e viktimave të identifikuara të trafikimit janë fëmijë.
Megjithatë, ekspertët besojnë se fëmijët ka të ngjarë të përbëjnë një përqindje edhe më të lartë të viktimave të mundshme të trafikimit nga Ukraina, shkruan SkyNews.
Kjo për shkak se gratë dhe fëmijët përbëjnë pothuajse të gjithë refugjatët që kanë ikur nga lufta deri më tani.
Rreth 500 të mitur të pashoqëruar u identifikuan duke kaluar nga Ukraina në Rumani nga 24 shkurti deri më 17 mars.
Afshan Khan, Drejtori Rajonal i UNICEF-it për Evropën dhe Azinë Qendrore, tha: “Lufta në Ukrainë po çon në zhvendosje masive dhe flukse refugjatësh, kushte që mund të çojnë në një rritje të konsiderueshme të trafikimit të qenieve njerëzore dhe një krizë akute të mbrojtjes së fëmijëve“.
