Një aksident tragjik në qarkun Essex të Anglisë i ka marrë jetën një fëmije, i cili u godit nga një kamion në rrugën Epping Road, në zonën e Ongar.
Sipas Policisë së Essex-it, ngjarja ndodhi të premten rreth orës 16:20. Ekipet emergjente mbërritën menjëherë në vendin e ngjarjes dhe e transportuan fëmijën në spital, por ai nuk arriti t’u mbijetojë plagëve të marra.
Pas aksidentit, drejtuesi i kamionit, një 48-vjeçar nga Derbyshire, u arrestua nën dyshimin për drejtim të rrezikshëm të automjetit që kishte shkaktuar lëndime të rënda. Pas vdekjes së fëmijës, ai është liruar me kusht deri në mesin e muajit shtator, ndërsa procedurat hetimore vazhdojnë.
Policia ka bërë të ditur se familja e viktimës po merr mbështetje nga oficerë të specializuar, ndërsa hetuesit po punojnë për të sqaruar rrethanat e plota të aksidentit.
Për shkak të ekzaminimeve në vendngjarje, segmenti rrugor ku ndodhi aksidenti u mbyll përkohësisht. Autoritetet u kanë bërë thirrje personave që mund të kenë parë ngjarjen ose posedojnë pamje nga kamerat e sigurisë apo kamerat e automjeteve të kontaktojnë policinë për të ndihmuar në hetime.
Sinjali – aty ku e vërteta flet para lajmit!
