Mbi 10 persona në Komunën e Malishevës janë testuar sot nën dyshimet se janë të prekur me pandeminë Covid-19. Deri tani nga kjo komunë janë konfirmuar 25 raste.

Kryetari i Komunës së Malishevës, Ragip Begaj ka thënë se gjendja atje është e qetë, derisa për rastet në këtë komunë ka thënë se janë raste të kontaktit.

“Gjendja është e qetë në përgjithësi. I kemi 25 raste në komunë, bashkë me ato që u konfirmun mbramë. Gjendja e të gjithëve është e mirë. Raste të reja të dyshuara kemi. Janë diku 12-13 persona që janë testuar sot e tash jemi në pritje të rezultateve. Probleme me furnizim me ushqim e barna s’kemi. Na kanë furnizuar shumë kompani me pako ushqimore e higjenike. Edhe Ministria e Shëndetësisë dy herë na ka furnizuar me mjete mbrojtëse”, ka thënë Begaj për Express.

Ndryshe, mbrëmë Instituti Kombëtar i Shëndetësisë Publike të Kosovës ka konfirmuar mbrëmë edhe tetë raste të reja me koronavirus, duke bërë që numri i rasteve në gjithë vendin të shkojë në 71.

Sipas IKSHP’së, rastet e konfirmuara pozitive janë raste kontakti prej të cilëve 4 raste janë me vendbanim në fshatin Domanek- Malishevë, 3 raste me vendbanim në Prishtinë dhe 1 rast me vendbanim në fshatin Studime e ulët-Vushtrri./GazetaSinjali/