Një vetaksident i rëndë sot i shkaktuar në Lëbushë të Deçanit i mori jetën një 22-vjeçari, teksa la të lënduar edhe tre persona të cilët ishin së bashku me viktimën në veturë, e që tashmë janë duke u trajtuar nën kujdesin intenziv, raporton Gazeta Sinjali.
22-vjeçari i cili humbi jetën është Egzon Vishaj nga Belegu i Deçanit.
Për vdekjen e tij ka reaguar edhe kryetari i Deçanit, Bashkim Ramosaj.
“I tronditur nga lajmi për vdekjen aksidentale të të riut Egzon Vishaj nga Belegu i Deçanit.
Në këto momente të rënda për familjen Vishaj, ndajmë dhembjen me ta dhe në emër të të gjithë qytetarëve të Deçanit shpreh ngushëllimet më të sinqerta për familjen.
Zoti ju dhashtë forcë që ta kaloni këtë dhembje!”, shkroi ai.
Rastin e ka konfirmuar edhe zëdhënësi i Policisë Rajonale në Pejë, Fadil Gashi, i cili tha se me të dalë në vendin e ngjarjes Policia hasur në katër personat e lënduar në këtë aksident, të cilët janë transportuar në Spitalin Rajonal në Pejë, atje ku edhe është konfirmuar vdekja e viktimës.
“Në orën 17:17 kemi pranuar informatën për një vetaksident trafiku të ndodhur në Lëbushë të Deçanit. Policia e Kosovës ka dalë menjëherë në vendin e ngjarjes dhe ka hasur në katër persona të lënduar të cilët ndodheshin në një veturë. Të lënduarit menjëherë janë transportuar drejt Spitalit Rajonal në Pejë, ku më pas është konfirmuar se njëri nga ta ka vdekur ndërsa tre të tjerët po trajtohen në kujdesin intensiv”, tha zëdhënësi i Policisë Rajonale në Pejë, Fadil Gashi.
