Drejtori i të ashtuquajturës “Zyre për Kosovën” në qeverinë serbe, Petar Petkoviq, ka reaguar menjëherë pas deklaratës së presidentes së Kosovës, Vjosa Osmani, e cila tha për Aleksandar Vuçiq, se ishte ministër i kriminelit të luftës, Sllobodan Millosheviq dhe se vazhdon ta ketë po të njëjtën mendësi të shekullit të kaluar.
“Ofendimet ndaj presidentit Aleksandar Vuçiq nga presidentja e Kosovës, Vjosa Osmani, që thotë se ai jeton në të kaluarën tregon se Vuçiqi goditi në target kur ai foli për politikanët e Prishtinës. Është interesante se si e njohu veten zonja Osmani dhe kjo është një mundësi për të mësuar një thënie tjetër serbe – një mizë i ra ariut!”, ka shkruar Petkoviq në Twitter.
Nga Mitrovica, Osmani foli për deklaratat ofenduese të Vuçiqit ndaj kryeministrit kosovar dhe presidentit malazez, të cilët i quajti “hiena”, derisa veten e pa si “ujk i vetmuar”.
”Ne nuk duhet të befasohemi nga gjuha e ministrit të Millosheviqit. Ai edhe në vitin 2022, ai po e dëshmon regjimin e shekullit të kaluar. Një njeri që vazhdon mendësinë e Millosheviqit, nuk mund të presim se mund të flasë me një mendësi të argumentuar”, ka thënë Osmani.
