Arilena dhe “Shaj” ka triumfuar në edicionin e 58-të të këngës në RTSH. Mes grupit më të diskutuar të pretendentëve, Arilena Ara është shpallur fituese dhe menjëherë pas marrjes së trofeut, ajo tha se ndryshe nga çdo këngë tjetër që ka krijuar, këtë e ka krijuar dhe ia ka dedikuar vetes.

“Unë nuk këndoj për trofe, unë nuk këndoj për të fituar çmime, unë këndoj sepse ia kam dedikuar jetën muzikës, sepse kam kënduar që 14 vjeç. Këtë herë, kam kënduar për veten, jam trembur, jam frikësuar, jam ndier në ankth, jam emocionuar me këtë këngë”, u shpreh Arilena.

Në vend të dytë u ngjit Elvana Gjata. Zhgënjimi në sytë e saj u shfaq që në momentin kur emrin i saj u thirr si fituese e vendit të dytë. Këngëtarja menjëherë pas kësaj është larguar nga skena.

Arilena e pyetur nëse ia dha dorën Elvana pasi u shpall fituese, ajo tha se në atë moment iu errën sytë dhe se nuk ka takuar akoma as mamin e saj. Ndërsa shtoi se e vlerëson jashtë mase Elvanën dhe se ka respekt për të.

“Akoma nuk kam takuar mamin tim. Në atë moment të erren sytë, nuk e di as kë takon, as kë duhet të takosh. Kam respekt, e vlerësoj jashtë mase. Jam e lumtur për të gjithë koleget e mi”, tha ajo.