Dy të infektuarit e parë me koronaviurs në Romë ishin një çift nga Wuhani, të cilët kishin udhëtuar drejt kryeqytetit italian si turistë. Ata mbeten atje dhe u shtruan në spitalin “Spalanzan”, ku qëndruan 40 ditë.

Ata u detyruan të kalonin nëpër disa faza rehabilitimi, duke përfshirë terapinë intensive. Në prill dolën dhe gruaja filloi të qante nga gëzimi, ndërsa personelit mjekësor të spitalit i tha: “Ju dua, e dua këtë qytet italian”.

Por mirënjohjen, ata vendosën të mos e shprehnin vetëm me fjalë. Për këtë arsye, i dhuruan spitalit 40 mijë euro. Zyrtari i qeverisë rajonale i ngarkuar me çështjet e shëndetësisë, Alessio D’Amato, e cilësoi donacionin e çiftit si “ një dhuratë të madhe” dhe i ftoi që të dy për një vizitë tjetër në Romë.

Në Itali, të drejtën e kujdesit shëndetësor ne strukturat publike e kanë të gjithë shtetasit vendas e të huaj, dhe ky kujdes është zakonisht pa pagesë, ose mund të ketë një kosto fare simbolike./GazetaSinjali/