Mosmarrëveshjet për pronë dinë të shkaktojnë zënka të mëdha mes anëtarëve të familjes, të cilët shpesh eskalojnë në kërcënime e sulme fizike ndaj njëri-tjetrit. Në telashe kanë përfunduar edhe dy vëllezër nga fshati Marec i komunës së Lipjanit, raporton Gazeta Sinjali.
E gjithë ngjarja dyshohet të ketë ndodhur mbrëmë rreth orës 22:00, ku një burrë dyshohet se ka sulmuar fizikisht vëllain e tij.
Burimet e Gazetës Sinjali kanë bërë me dije se 60-vjeçari ka deklaruar se teksa po qëndronte para dyerve të oborrit të tij, vëllai më i ri në moshë ka shkuar dhe e ka sulmuar fizikisht duke e goditur me grushte.
Por një version tjetër e ka rrëfyer vëllai i cili u denoncua si i dyshuar.
Sinjali mëson se ai ka deklaruar se ka qenë vëllai i tij ai i cili e ka sulmuar i pari, duke shkuar te shtëpia e tij dhe duke e goditur me grushte. Si pasojë e goditjeve, 57-vjeçarit i është thyer një dhëmb, për çka edhe ka kërkuar ndihmë mjekësore në spital.
Motivi që dyshohet se çoi në rrahjen e përgjakshme mes vëllezërve është një kontest gjyqësor për një pronë, problem i cili nuk është zgjidhur tash e gjashtë vite.
Sipas dëshmisë së njërit prej vëllezërve, ndonëse kanë pasur zënka të vazhdueshme rreth tokës, nuk janë përleshur asnjëherë më parë mes vete.
Pas përfundimit të procedurave policore, Prokurori i Shtetit ka urdhëruar që të dyshuarit të dërgohen në mbajtje për 48 orë dhe ndaj tyre është iniciuar rasti për veprat ‘Lëndim i lehtë trupor’ dhe ‘Lëndim i rëndë trupor’.
