Barcelona është akuzuar për korrupsion lidhur me pagesat që klubi i ka bërë ish-zëvendëspresidentit të Komitetit të arbitrave të Spanjës, Jose Maria Enriquez Negreira.
Të premten, zyra e prokurorit publik tha se prokurorët spanjollë kishin paraqitur një ankesë kundër gjigantëve katalanas dhe dy prej ish-presidentëve të klubit LaLiga lidhur me pagesat e supozuara ndaj një kompanie në pronësi të zyrtarit të lartë të arbitrave për të ndikuar në rezultatet e ndeshjeve.
Klubi dyshohet se ka paguar mbi 7.3 milion € (6.4 milion £) midis 2001 dhe 2018 firmave në pronësi të Enriquez Negreira, i cili mbajti rolin në shoqatën spanjolle të futbollit midis 1993 dhe 2018, transmeton Sinjali Sport.
Prokurorët pretendojnë se me një marrëveshje të fshehtë dhe “në këmbim të parave”, Negreira favorizoi Barcelonën “në vendimet e marra nga arbitrat në ndeshjet e luajtura nga klubi, si dhe në rezultatet e garave”.
Një zyrtar i lartë i Barcelonës i tha Reuters se klubi e priste ankesën, por tha se “nuk ishte asgjë më shumë se një hipotezë hetimore absolutisht paraprake” nga prokurorët dhe se “tani është kur hetimi gjyqësor fillon siç duhet”.
Zyrtari shtoi se “klubi do të bashkëpunojë plotësisht me hetimin në të gjitha mjetet e nevojshme” dhe “përsërit se ata kurrë nuk kanë blerë asnjë gjyqtar dhe nuk janë përpjekur të ndikojnë në vendimet e ndonjë zyrtari”.
Klubi mohoi keqbërjen në një deklaratë muajin e kaluar, duke thënë se ata thjesht kishin paguar një konsulent të jashtëm që i furnizonte me “raporte teknike në lidhje me arbitrimin profesionist”, duke e quajtur atë “një praktikë të zakonshme midis klubeve profesionale të futbollit”.
Ankesa fokusohet në 2.9 milionë euro të paguara midis 2014 dhe 2018 dhe pretendon se Barcelona – me ndihmën e ish-presidentëve Sandro Rosell dhe Josep Maria Bartomeu – arriti një “marrëveshje verbale konfidenciale” me Negreira.
Ai akuzon klubin, Rosell, Bartomeu, Negreira dhe dy ish-zyrtarë të tjerë të Barcelonës për korrupsion në sport, administrim të padrejtë dhe falsifikim në dokumentet tregtare.
Hetimi ka nisur nga një kontroll tatimor. Sipas gazetës El Pais, Negreira i tha agjencisë spanjolle të taksave se qëllimi i Barcelonës me pagesat ishte të kishte gjyqtarë “neutralë” në lojërat e tyre.
