Anëtarët e familjes Hasanaj nga fshati Llapqevë i Malishevës, natën e 2 shtatorit, kanë përjetuar tmerrin me sy. Kryefamiljari Nazmiu, nën ndikimin e alkoolit, mori armën e zjarrit dhe plagosi djalin e tij 26 vjeçar Liridonin, ndërsa të ngujuar i mbajti 10 anëtarët e shtëpisë së tij, derisa policia arriti në vendin e ngjarjes.

Gazeta Sinjali ka mësuar detaje ekskluzive nga ngjarja që tronditi Malishevën, tri ditë më parë.

Sipas deklaratës së djalit tjetër të të dyshuarit, motivi i kësaj ngjarje është lidhja e dashurisë së motrës së tij me një djalë, për të cilën nuk ia dha ‘bekimin’ babai.

Ai ka deklaruar se babai Nazmiu nuk ka pranuar që ajo të lidhej me atë djalë e as të martohej.

Konflikti në familje eskaloi deri në pikën sa 61 vjeçari shkoi në shtëpinë tjetër, po ashtu pronë e tij, mori armën e zjarrit dhe shkrepi në drejtim të djalit të tij 26 vjeçar, Liridonit. Këtë të fundit, policia e gjeti të shtrirë në dysheme me lëndime të rënda në pjesën abdominale, në anën e djathtë.

Por, para se të arrinte policia në vendin e ngjarjes, djali tjetër i të dyshuarit, i cili po kontaktonte me zyrtarët e PK-së, kishte shfaqur shqetësim se babai i tij do t’i vriste të gjithë.

Dyshohet se 61 vjeçari kishte gjuajtur me armë zjarri në mënyrë të pakontrolluar edhe në drejtim të anëtarëve të tjerë të familjes, duke i rrezikuar të gjithë. Si pasojë e këtyre veprimeve, kishin mbetur të ngujuar 10 anëtarët e familjes Hasanaj.

Tutje, Gazeta Sinjali mëson se kur policia ka mbërritur në vendngjarje, i dyshuari e kishte lëshuar pistoletën në tokë. Arma me tre plumba dhe gëzhoja e cila dyshohej se ishte përdorur në këtë rast, është konfiskuar. Ndërsa, është bërë edhe bastisja e dy shtëpive, pronë e të dyshuarit, për shkak se në njërën shtëpi kishte marrë armën e në tjetrën e kishte kryer veprën.

Megjithatë,  gjatë bastisjes në asnjërën shtëpi nuk është gjetur asgjë tjetër ilegale.

Ndaj Nazmi Hasanajt është hapur rasti “Vrasje në tentativë” dhe gjatë kohës së intervistimit, policia ka konstatuar se i njëjti kishte qenë në ndikimin e alkoolit. Atij i është bërë matja e alkoolit në organizëm dhe ka rezultuar 1.27 promilë.

Ndërsa, i plagosuri fillimisht kishte pranuar ndihmë mjekësore në në vendin e ngjarjes nga ekipi i QKMF-së në Malishevë, pastaj është dërguar për trajtim të mëtejshëm në QKUK dhe sipas mjekëve gjendja e tij është stabile.

Gazeta Sinjali mëson se sektori Rajonal i Hetimeve DRP-Gjakovë, ka paraqitur kallëzim penal kundër Nazmi Hasanajt në Prokurorinë Themelore në Gjakovë.

Prokuroria Themelore në Gjakovë ka parashtruar në Gjykatën Themelore në Gjakovë kërkesë për caktimin e masës së paraburgimit ndaj Nazmi Hasanajt dhe kjo kërkesë është aprovuar nga Gjyqtari i Procedurës Paraprake, i cili ka urdhëruar masën e paraburgimit në afat prej 30 ditësh . /Gazeta Sinjali/

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.