Asociacioni i Gazetarëve të Kosovës ka dënuar sulmin fizik  ndaj gazetares Norë Kelmendi gjatë kryerjes së detyrës së saj zyrtare.

AGK përmes një reagimi për medie ka shprehur shqetësim sesi një pronar i një kompanie ndërtuese e ka penguar gazetarën për të raportuar lidhur me një rast me interes publik, anipse gazetarja kishte pasur leje paraprake për xhirim nga isnpektori i ndërtimit.

AGK fton Policinë e Kosovës dhe të gjithë ata që janë të thirrur për të mbrojtur dhe ruajtur rendin e ligjin, që të marrin masa konkrete dhe të mos lejojnë që gazetarët të pengohen gjatë kryerjes së detyrës. /Gazeta Sinjali/

Në vijim reagimi i plotë i AGK-së:

PRISHTINË, 28.10.2019 – Asociacioni i Gazetarëve të Kosovës ka pranuar me shqetësim veprimin e pronarit të një kompanie ndërtuese, Arsim Rexhepi, ndaj gazetares së Ekonomia Online, Norë Kelmendi.

Kelmendi ka qenë duke realizuar një kronikë për një incident në kryeqytet, ku nga shembja e dheut janë dëmtuar disa vetura. Gjatë kryerjes së detyrës, ajo është penguar nga z. Rexhepi, i cili e ka tërhequr për krahu gazetaren, duke e larguar nga vendpunishtja, ani pse ekipi i EO kanë poseduar leje për xhirime nga inspektori i ndërtimit.

Gjatë këtij incidenti, ka ndërhyrë edhe policia, me ç’rast kanë marr deklaratat e të dyja palëve të përfshira.

AGK fton Policinë e Kosovës dhe të gjithë ata që janë të thirrur për të mbrojtur dhe ruajtur rendin e ligjin, që të marrin masa konkrete dhe të mos lejojnë që gazetarët të pengohen gjatë kryerjes së detyrës.

Gjithashtu, AGK inkurajon të gjithë punonjësit medial të mos heshtin dhe të raportojnë për çdo padrejtësi që iu bëhet gjatë punës së tyre.