Një vajzë 1-vjeçare ka shpëtuar mrekullisht e gjallë pasi kaloi 3 ditë e tre netë vetëm në një pyll të mbushur me arinj e ujq të egër në Rusi.
Liuda Kuzina ishte larguar nga nëna e saj teksa po luante në kopshtin pa gardh të shtëpisë në Obninsk në rajonin Smolensk, shkruan The Sun.
Rreth 500 njerëz iu bashkuan në kërkimet masive që pasuan pas lajmit të zhdukjes, dhe shpresat po shuheshin kur ajo papritur u gjet e gjallë.
Liuda, vajza 22-muajshe, ishte zbuluar në një zonë të dendur pyjore rreth 3 km larg shtëpisë së saj, njoftonin mediat vendase.
“Një prej grupeve të kërkimit kishin ndaluar për të pushuar pas kërkimeve të zgjatura, kur papritur dëgjuan disa zhurma të zbehta zanore. Ata thirrën përsëri dhe zhurma u përsërit”, tha zëdhënësi i një prej grupeve të shpëtimit, duke shtuar se Liuda menjëherë kishte zgjatur krahët e saj drejt punonjësve.
Ajo u gjet në një zonë me pemë të rrëzuara ku bredhin shpesh kafshë të egra përfshi arinj të murrmë dhe ujq.
Temperaturat e natës në zonë kanë qenë çuditërisht të ngrohta, rreth 20 gradë, çka ka ndihmuar në mbijetesën e saj.
“Ajo ishte e dobët, e pickuar shumë nga insektet, por ajo çka ka rëndësi është se ishte gjallë,” thanë shpëtimtarët.
Në pamjet e shpërndara shihet kur vajza bashkohet me nënën e saj.
Ajo aq në gjendje sa të pinte vetë nga shishja e ujit.
Mamaja e saj, e cila nuk është përmendur me emër në raportime, kishte shkuar të fliste me një fqinj, kur Liuda kishte tentuar ta ndiqte, por përfundoi e humbur.
“Grupet e shpëtimit e nxorën atë nga pylli,” tha avokatja e popullit e Kremlinit, Anna Kuznetsova.
“Tani bebja është në spital dhe po ekzaminohet nga doktorët. Ajo po përpiqet të flasë”.
Ministrja rajonale e shëndetësisë Olga Stunzhas tha: “Gjendja shëndetësore e vajzës raportohet si e moderuar, nuk ka kërcënime për jetën, është duke marrë serum intravenoz për t’i shtuar fuqinë”.
