image Rama, Zaev e Vuçiq takohen në Shkup, pritet ndryshimi i emrit të Mini-shengenit

Rajon

Rama, Zaev e Vuçiq takohen në Shkup, pritet ndryshimi i emrit të Mini-shengenit

news image

Këtë të enjte në Shkup mbahet forumi ekonomik rajonal me pjesëmarrjen e kryeministrave të Maqedonisë Veriore Zoran Zaev, atij të Shqipërisë, Edi Rama dhe presidentit të Serbisë, Aleksandar Vuçiq.

Iniciativës rajonale të njohur si mini-shengeni do të i ndryshohet emri sot. Kështu ka paralajmëruar kryeministri shqiptar Edi Rama dhe presidenti serb, Aleksandar Vuçiq.

Një ditë para samitit, të tre liderët kanë bërë një shëtitje së bashku në sheshin e Shkupit.

Takimi mbahet në kuadër në iniciativës së bashkëpunimit rajonal që njihet si “mini-Shengeni” ballkanik, që sipas paralajmërimit të presidentit serb do të marrë një emër të ri.

Zaev, Rama dhe Vuçiq do të nënshkruajnë dy memorandume dhe një marrëveshje ndërshtetërore që ka për qëllim lehtësimin e lëvizjes së njerëzve dhe thjeshtimin e formaliteteve lidhur me importin, eksportin dhe lëvizjen mallrave, bashkëpunimin mes doganave dhe autoriteteve të tjera kompetente.

Forumi i Shkupit për Bashkëpunim Rajonal në Ballkanin Perëndimor do të mbledh më shumë se 300 kompani nga Maqedonia Veriore, Serbia, Shqipëria, dhe BeH, si dhe biznese tjera rajonale. Edhe në këtë takim Kosova nuk merr pjesë, sikur edhe samitet e kaluara mes Zaevit, Ramës dhe Vuçiqit.

Në një fjalim që mbajti në konferencën ndërkombëtare “Prespa Forum”, në Ohër më 2 korrik, kryeministri Albin Kurti, ka thënë se Kosova refuzon pjesëmarrjen në nismën e mini-Shengenit pasi sipas tij rajoni duhet t’i kthehet agjendës së integrimit në Bashkimin Evropian.

/GazetaSinjali/