Drejtori i Inspeksionit, Hysni Ahmeti, në bashkëpunim me Policinë kanë kryer mbrëmë para mesnatës kontrolle inspektuese në disa klube nate në qytetin e Mitrovicës.

Kontrollet janë bërë për shkak të (mos)respektimit të orarit të punës në këto biznese.

“Qëllimi i këtyre inspektimeve ka të bëjë me respektimin e orarit të punës nga bizneset e përfshira në këtë kontroll të cilat zhvillojnë veprimtaritë e tyre pas orës 23:00, ndërsa nga Drejtoria e Inspeksionit  këto subjekte afariste janë udhëzuar të pajisen me leje të veçanta për zgjatje të orarit të punës”, thuhet në një komunikatë lëshuar nga komuna e Mitrovicës.

Gjatë aksionit janë inspektuar gjithsej katër subjekte afariste, ku pas inspektimit është kërkuar që të respektohet rregullorja komunale për caktim të orarit të punës për subjektet afariste.

“Drejtoria e Inspeksionit do të vazhdoj edhe më tutje me aksione të tilla si dhe do të ndërmarrë të gjitha masat e nevojshme ndaj pronarëve të cilët neglizhojnë  rregullat lidhur me  respektimin e orarit zyrtar të paraparë”, thuhet në komunikatën e komunës.