Një zjarr i madh ka përfshirë një fermë blegtorie në Patos të Shqipërisë, duke shkaktuar dëme të konsiderueshme materiale dhe humbje të bagëtive.
Flakët shpërthyen gjatë mesditës dhe u përhapën me shpejtësi, të ndihmuara nga temperaturat e larta dhe sasia e madhe e ushqimit për kafshët që ndodhej në objekt.
Fermerët dhe banorët e zonës u përpoqën fillimisht të vinin nën kontroll zjarrin dhe të shpëtonin bagëtitë, deri në mbërritjen e ekipeve të zjarrfikësve të Patosit, raporton Abcnews.al, transmeton Sinjali.
Për shkak të përmasave të zjarrit, në operacion u angazhuan edhe zjarrfikësit nga Fieri. Pas disa orësh ndërhyrje, ekipet arritën ta lokalizonin zjarrin dhe të pengonin përhapjen e tij në objektet përreth.
Nga zjarri, sipas bilancit paraprak, kanë ngordhur mbi 10 krerë bagëti, ndërsa janë djegur sasi të mëdha ushqimi për kafshët, makineri bujqësore dhe një pjesë e stallave të fermës.
Në vendin e ngjarjes kanë dalë edhe policia dhe grupi hetimor, të cilët kanë nisur punën për të zbardhur shkaqet e shpërthimit të zjarrit.
Sinjali – aty ku e vërteta flet para lajmit!
