Kryetari i ri i partisë së Unionit Kristian-demokrat të kancelares Angela Merkel, është zgjedhur Armin Laschet, shkruan Gazeta Sinjali.
Ai u zgjodh me 521 vota të delegatëve, kurse kandidati tjetër, Friedrich Merz, i cili nga disa quhej “Trumpi gjerman”, humbi në balotazh.
Laschet nga viti 2017 ka shërbyer si kryeministër rajonal i rajonit me popullsinë më të madhe në Gjermani, Nordrhein-Westfalen.
Në fjalimin e tij para procesit të votimit, ai e theksoi rëndësinë e unitetit.
“CDU-ja nuk ka nevojë për një shef ekzekutiv që ta udhëheqë atë, por për një kapiten të ekipit që do t’i prijë rrugës dhe ta mbajë partinë të bashkuar”.
Laschet po ashtu ka qenë një nga nënkryetarët e CDU-së që nga viti 2012, gjersa gjatë tërë kohës ka qenë partner i besueshëm i Angela Merkel.
Ndërkaq, ai në vitin 2019 formoi një aleancë me ministrin gjerman të Shëndetësisë, Jens Spahn.
Vetëm disa ditë para votimit të kryetarit të ri të partisë, ata publikuan një program 10-pikësh, teksa theksuan se synojnë që këtë dekadë ta bëjnë dekadë të modernizimit për Gjermaninë.
