Golden Eagle Ylli ka triumfuar në derbi ndaj Trepçës me rezultat 91:68 (23:29, 20:11, 29:12, 19:16), në kuadër të xhiros së tetë në Art Motion Superligën e Kosovës në basketboll.

Fillimi i ndeshjes ishte i barabartë deri tek rezultati 12:12 dhe më pas mysafirët krijuan epërsi prej pesë pikësh 16:21, ndërsa çereku i parë përfundon 23:29.

Vendasit e nisën më mirë periudhën e dytë, duke barazuar shifrat në 30:30, e më pas për të kaluar në epërsi 39:33, dhe më pas zhvillohet lojë e baraspeshuar, ndërsa skuadrat shkuan në pushim me shifrat 43:40.

Therandasit vazhduan me lojë të mirë edhe në pjesën e dytë, ku dallimin e bënë në periodën e tretë. Ata ngritën epërsinë minutë pas minute, duke arritur deri në 20 pikë epërsi 72:52, sa ishte rezultati në semafor pas 30 minutash. Në 10 minutat ata menaxhuan epërsinë e krijuan dhe në fund triumfuan me rezultat bindës 91:68.

Te Golden Eagle Ylli u dalluan Mikaile Tmusiq me 21 pikë, shtatë kërcime e pesë asistime, Cameron Williams me 20 pikë, pesë kërcime e dhjetë asistime dhe Ardit Pepaj me 20 pikë.

Trepça i kishte dy lojtarë ditën e tyre, Amin Hoti me 17 pikë, nëntë kërcime e shtatë asistime dhe Drilon Hajrizi me 19 pikë. Ylli ka katër fitore dhe katër humbje, ndërsa Trepça pesë fitore dhe dy humbje.  /Gazeta Sinjali Sporti/