Wimbledon njoftoi të mërkurën se ata i kanë ndaluar të gjithë lojtarët nga Rusia dhe Bjellorusia nga kampionati i kësaj vere për shkak të dhunës së vazhdueshme në Ukrainë.
Kjo do ta penalizojë më së shumti tenistin rus, Daniil Medvedev, transmeton Sinjali Sport.
Medvedev, numri 2 i botës dhe kampioni në fuqi i US Open, ishte ndër favoritët për të fituar Wimbledon këtë verë.
Si Rusia ashtu edhe Bjellorusia do të preken nga pezullimi, që do të thotë se numri 4 i botës për femra Aryna Sabalenka është gjithashtu jashtë.
Në një deklaratë të Wimbledon thuhej: “Ne ndajmë dënimin universal të veprimeve të paligjshme të Rusisë dhe e kemi shqyrtuar me kujdes situatën në kontekstin e detyrave tona ndaj lojtarëve, ndaj komunitetit tonë dhe ndaj publikut më të gjerë në Mbretërinë e Bashkuar si një institucion sportiv britanik. Ne kemi marrë gjithashtu parasysh udhëzimet e përcaktuara nga Qeveria e Mbretërisë së Bashkuar veçanërisht në lidhje me organizimet dhe ngjarjet sportive.
“Duke pasur parasysh profilin e Kampionatit në Mbretërinë e Bashkuar dhe në mbarë botën, është përgjegjësia jonë të luajmë rolin tonë në përpjekjet e përhapura të qeverisë, industrisë, sportit dhe institucioneve krijuese për të kufizuar ndikimin global të Rusisë me mjetet më të forta të mundshme.
“Në rrethanat e një agresioni ushtarak të tillë të pajustifikuar dhe të paprecedentë, do të ishte e papranueshme për regjimin rus që të përfitonte nga përfshirja e lojtarëve rusë ose bjellorusë në Kampionatin.
“Prandaj, synimi ynë është, me keqardhje të thellë, të refuzojmë hyrjet nga lojtarët rusë dhe bjellorusë në Kampionatin 2022. Nëse rrethanat ndryshojnë materialisht nga tani deri në qershor, ne do të shqyrtojmë dhe do të përgjigjemi në përputhje me rrethanat.
“Ne mirëpresim gjithashtu vendimin e LTA për refuzimin e hyrjeve nga lojtarët rusë dhe bjellorusë në ngjarjet në Mbretërinë e Bashkuar për të siguruar që tenisi britanik po jep një qasje të qëndrueshme gjatë gjithë verës”, është thënë ndër të tjerash në komunikatën zyrtare të Wimbledon.
