image William Walker tregon se çfarë kërkoi në takim nga LDK-ja dhe VV-ja

Kosovë

Takim/ William Walker tregon se çfarë kërkoi në takim nga LDK-ja dhe VV-ja

news image

Ish-ambasadori i OSBE-së gjatë luftës së Kosovës, William Walker ka dhënë përshtypjet e tij, për takimet me zyrtarët e Lëvizjes Vetëvendosje dhe LDK-së.

Walker në një intervistë për “Dossier D” në RTV Dukagjini ka thënë se takimet që ka pasur me zyrtarët e LDK-së dhe ata të Vetëvendosjes nuk kanë pasur ndonjë qëllim të caktuar pos “marrjes së informacionit me atë çka po ndodh në Kosovë”.

Ai tha se ka kërkuar shpjegimet nga këto dy parti pse nuk po mund të krijohen institucionet pas një muaj negociatash.

“Të dy takimet ishin shumë të mira dhe frytdhënëse. Zonja Osmani nga LDK më impresionoi. Është shumë e mençur dhe më shumë përvojë në politikë. E njëjta mund të thuhet edhe për Albin Kurtin”, ka thënë Walker.

Ish-ambasadori i OSBE-së gjatë luftës së Kosovës, thotë se Kosova tashmë ka kuadro të reja dhe që nuk janë veteranë të luftës apo veteranë të politikës të cilët mund ta dëshmojnë veten në zhvillimin e vendit.

Ai ka thënë se Albin Kurtin e njeh nga koha e luftës si përkthyes i Adem Demaçit dhe se ka pritje të mëdha për të.

“Jo vetëm unë dhe ju në Kosovë, por ka pritje të mëdha edhe nga diaspora sepse shqiptarët në të gjithë botën shpresojnë që ajo që u është premtuar do të realizohet, sepse njerëzit e Reçakut janë flijuar për këtë kauzë”, u shpreh Walker.

Walker ka thënë se pas takimeve që ka pasur me Albinin, Vjosën dhe të tjerët mendon se “është çasti kur gjërat fillojnë të ndodhin”.