Gjatë ditës së djeshme Qeveria e Serbisë vendosi që veturat me targa RKS të lejohen të qarkullojnë brenda territorit të saj që nga 1 janari i vitit të ardhshëm. Këtë vendim e ka shpalosur drejtori për Kosovë në Qeverinë e Serbisë, Petar Petkoviq i cili tha se po e implementojnë një marrëveshje të nënshkruar nga Borko Stefanoviq, tani opozitar serb, raporton Gazeta Sinjali.
E, për këtë vendim ka reaguar Lëvizja Vetëvendosje, e cila tha se këmbëngulja e tyre e detyroi Qeverinë serbe ta pranojë këtë marrëveshje, teksa e vlerësojnë si arritje të rëndësishme të shtetit e qeverisjes.
Vetëvendosje po ashtu shtoi edhe disa sugjerime të radhës për qeverinë në fjalë.
“Këmbëngulja jonë në atë që është e drejtë, në fund e detyroi Serbinë të zmbrapset e t’i pranoj targat RKS. Do të duhej që pas kësaj ajo t’i pranojë edhe pasaportat, diplomat e të gjitha dokumentet. Kjo është një e arritur e rëndësishme e shtetit dhe qeverisë tonë për qytetarët e Republikës së Kosovës”, thanë nga kjo parti.
